မေတ္တာတရား

ဒီနေ့ဟာ - မြန်မာသက္ကရာဇ် ၁၃၆၉ ခုနှစ်၊ ၀ါခေါင်လကွယ်နေ့၊ အင်္ဂါနေ့ ဖြစ်ပါတယ်...
ဒီလို ဥပုသ်နေ့ တစ်နေ့မှာ ရပ်နီးရပ်ဝေးက မြင်ဖူး၊ မမြင်ဖူးတဲ့
သူငယ်ချင်းတွေ အတွက် နာကြားဖြစ်တဲ့ တရားတော် တစ်ပုဒ်ကို ဝေမျှပေးလိုက်ပါတယ် ...
“သီတဂူဆရာတော်ကြီး အရှင်ဥာဏိဿရ” ဟောကြားတော်မူတဲ့
“မေတ္တာတရား” တရားတော်ပါ...အကြောင်းအရာ အချို့ကို ထုတ်နှုတ် ဖော်ပြထားတာ ဖြစ်ပါတယ် ...
အောက်ဘက်မှာ တရားတော် ကို ဒေါင်းလုဒ် ရယူနိုင်တဲ့နေရာလည်း ပေးထားပါတယ်...
ဖတ်ရှု နာယူကြည့်ကြပါ သူငယ်ချင်းများ...

တရားတော်မှ ထုတ်နှုတ်ဖော်ပြချက် အချို့
မေတ္တာဆိုတာ ချစ်တယ်ဆိုတာနဲ့ မတူပါ...
မေတ္တာဆိုတာ ဘယ်လိုစိတ်ထားမျိုးလဲ...
မြင်ဖူးသူ၊မမြင်ဖူးသူ ချစ်သူ၊မုန်းသူ ဝေးသူ၊နီးသူ သွေးစပ်သူ၊သွေးမစပ်သူ စသည်ဖြင့် အပိုင်းအခြား အကန့်အသတ်မရှိ ကောင်းကျိုး ဖြစ်စေလိုသော သဘောရှိတာ မေတ္တာ.. ကိုယ်တိုင် လွယ်မွေးခဲ့ ရတဲ့ သားတစ်ယောက်ပဲ ရှိတဲ့ မိခင်တစ်ဦးက ကိုယ့်အသက်ကိုယ်ပင် စွန့်လွှတ်၍ ထိုသားကို ကာကွယ် စောင့်ရှောက်သကဲ့သို့ သတ္တ၀ါ အနန္တရဲ့ အပေါ်မှာ သန့်ရှင်းသော၊ အပိုင်းအခြား အကန့်အသတ်မရှိ ကောင်းကျိုး ဖြစ်စေချင်သော၊ မိခင်စိတ်နှင့်တူလှစွာသော စိတ်မျိုးကိုထားခြင်း .... တဏှာရာဂမပါသော၊ သန့်သန့်ရှင်းရှင်း ချစ်သော၊ မိမိအတွက် မျှော်လင့်ချက်မထားသော၊ သားသမီးအပေါ် အပိုင်းအခြား အကန့်အသတ်မရှိ ကောင်းကျိုးဖြစ်စေလိုသော စိတ်ထားမျိုးများ... ထားရှိခြင်း

မာတုပုရ လောဟိတ
ရင်သွေးဆိုတာ မိခင်ရဲ့ ရင်မှဖြစ်တဲ့ သွေးနီနီတွေဟာ မိခင်ရဲ့ ကြီးမားတဲ့ မေတ္တာဓါတ် အစွမ်းကြောင့် ပကတိဖြူစင် သန့်ရှင်းတဲ့ နို့ရည်အဖြစ် သောက်သုံးခွင့်ရတဲ့သူ ၊မိခင်ရဲ့ နီရဲတဲ့ သွေးကနေ ဖြူစင်တဲ့ မေတ္တာကြောင့် အနီရောင်ကနေ အဖြူရောင်သာဖြစ်၊ မိခင်ရဲ့ မေတ္တာဓါတ်ကို နေ့တိုင်းနေ့တိုင်း သောက်သုံးခွင့်ရတဲ့ ကလေးဖြစ်လို့ အရှေ့တိုင်းမှာ သေတဲ့ အထိခွဲလို့ မရတဲ့ မိသားစုစိတ်ဓါတ် ပေါ်ထွန်းလာတာ...

လူနို့သောက်တဲ့ အကျင့်ကနေ တိရိစ္ဆာန်နို့ပြောင်းတိုက်တဲ့ ခေတ်ဖြစ်လာတာ စိုးရိမ်စရာ၊စိတ်ဓါတ်နဲ့ အကျင့်တွေ ပြောင်းသွားနိုင်၊ သားသမီး ၀တ္တရား (၅)ပါး၊ မိဘ ၀တ္တရား (၅)ပါး စတဲ့ အပြန်အလှန် ဆောင်ရွက်ရတဲ့ အလေ့အထတွေ ကျင့်ဝတ်တွေ ပျောက်သွား ... မွေးကတဲက တိရိစ္ဆာန်နို့ သောက်လာခဲ့တဲ့သူတွေ မိခင်မေတ္တာ မရလို့ ရိုင်းစိုင်းလာတာ မဆန်းပါ ...

ကြမ်းတမ်းတဲ့ အလေ့အထတွေကို မေတ္တာနဲ့သာ ပျောက်အောင် လုပ်နိုင်တယ်...
မေတ္တာပွားခြင်းအားဖြင့် နူးညံ့၊ ရိုးသား၊ ဖြောင့်မတ်၊ လောဘကင်းလာ၊ စိတ်ဓါတ်ရဲ့ အရည်အသွေးတွေ တိုးတက်လာမယ်..

မေတ္တာ ဘာဝနာ
မေတ္တာဆိုတာ တစ်ဦးတည်းသော သားရှိတဲ့ မိခင်စိတ်မျိုး၊ ကိုယ့်အတွက် ဘာမျှော်လင့်ချက်မှ မထားဘဲ သူ့အတွက် ကောင်းကျိုးဖြစ်စေချင်တဲ့ စိတ်ကို အပိုင်းအခြား အကန့်အသတ်မရှိ ကိုယ့်ရင်ထဲမှာ နာနာမွေးတာဟာ မေတ္တာ ဘာဝနာဖြစ်ပါတယ်...
မည်သည့် အကြောင်းကြောင့်နဲ့မှ စိတ်မဆိုးတာ မေတ္တာစိတ်.. အဒေါသ (ဒေါသရဲ့ဆန့်ကျင်ဘက်)
မေတ္တာ ပွားတယ်ဆိုတာ ဒေါသကို ဖယ်ရှားတာ
ပထမအဆင့် ဒေါသမထွက်အောင် ထိန်းထား
ဒုတိယအဆင့် ရင်ထဲကနေ အပြင်ထွက်မလာအောင် နှိပ်ကွပ်ထား
နောက်ဆုံးမှာ ဒေါသကို ကိုယ့်ရင်ထဲက ဖယ်ထုတ်လိုက်

မေတ္တာပွားတဲ့ နည်း
သတ္တ၀ါအားလုံး ချမ်းသာပါစေ - ဒီလိုစတင်ပါတယ်

ကိုယ်က ချမ်းသာပါစေလို ပြောတိုင်း တခြားသူ ချမ်းသာမှာလား ...
ကိုယ့်မှာ ဒေါသထွက်နေရင် အနီးနားကလူ စိတ်မချမ်းသာတာ သေချာတယ် ...
ကိုယ့်မှာ ဒေါသငြိမ်းနေရင် ကိုယ်နဲ့ ဆက်ဆံနေရသူတွေက ပွင့်ပွင့်လင်းလင်း ရင်းရင်းနှီးနှီး ဆက်ဆံချင်တဲ့ စိတ်တွေ ပေါ်လာတယ်...
ဒါဟာ ကိုယ့် ပတ်ဝန်းကျင် ချမ်းသာတာပဲ
ကိုယ့်ပတ်ဝန်းကျင် ချမ်းသာတာကို တဖြည်းဖြည်းချဲ့သွားကြည့်လိုက်ပါ .... ဒါ မေတ္တာပွားတာပါပဲ..

မေတ္တာအကျိုး
သူတပါးချမ်းသာအောင် မေတ္တာပွားတဲ့အခါ တကယ်အကျိုး ချက်ချင်းခံစားရသူက မေတ္တာပွားသူ
ချက်ချင်းစိတ်ချမ်းသာရတယ်
ဒေါသဟာ စိတ်ကို ဒုက္ခပေးနေတဲ့ ရောဂါ..
ဒေါသတည်းဟူသော ရောဂါကို
၁). ထိန်းထားရမယ်
၂). အပြင်ထွက်မလာအောင် ဖိနှိပ်ထားရမယ်
သီးခံခြင်းတရားနဲ့ မေတ္တာတရားတို့ဟာ ဗုဒ္ဓဖြစ်ကြောင်း တရား ပါရမီဆယ်ပါးမှာ ပါဝင်တယ်

ဒေါသကြီးသူ
ဒေါသကြီးသူတွေဟာ

သူတပါးဒုက္ခရောက်မှ ကြေနပ်ကြတယ် သူတပါး ဒုက္ခရောက်အောင်လည်း မရောက် ရောက်အောင်လုပ်တယ်

ဒေ၀ဒတ်နဲ့ သူ့ဖခင် အခုထိ အ၀ီစိမှာရှိနေသေးတယ်
ပထမသင်္ဂါယနာတင်ခဲ့တဲ့ သာသနာ့ ဒါယကာ အဇာတသတ်မင်း အခုထိ လောဟဂုမ္ဘီငရဲမှာ ရှိနေသေးတယ်

အဇာတသတ်ဟာ သောတာပန် ဖြစ်လုဆဲဆဲမှာ အပေါင်းအသင်း (Association) မကောင်း၊ ပတ်ဝန်းကျင် (Environment) မကောင်းတဲ့ အတွက် နိဗ္ဗာန်တံခါးကို မခေါက်နိုင်ခဲ့ဘူး မြတ်စွာဘုရား ဆီကို တရားနာ တစ်ခေါက် ရောက်ရဖို့ အရေး ဒိဌိဆရာတွေဆီကို ခြောက်ခေါက် ခေါ်သွားတာကို ခံခဲ့ရတယ် ဘ၀လမ်းကြောင်း ဖြောင့်ဖြူးဖို့ အတွက် အပေါင်းအသင်းနဲ့ ပတ်ဝန်းကျင်ဟာ သိပ်အရေးကြီးတယ်

လောကမှာ အကောင်းဟာနည်းတယ်
အနှစ်ရှိတဲ့သူကို အနှစ်တွေပဲ ၀ိုင်းရံတာ
အနှစ်ရှိတဲ့သူကို နေရာမှာ အကာတွေပဲ ၀ိုင်းရံတာ
အကာရှိတဲ့ နေရာမှာ အနှစ်တွေပဲ ၀ိုင်းရံတာ
အကာရှိတဲ့ နေရာမှာ အကာတွေပဲ ၀ိုင်းရံတာ ဆိုပြီး ပရိသတ် လေးမျိုးရှိတယ်

ကိုယ်တိုင် အနှစ်မရှိတဲ့ အဇာတသတ်ဟာ အနှစ်မရှိသူတွေနဲ့ ပေါင်းမိပြီး အဖေကို သတ်မိတာပဲ

အလွန်ကောင်းတဲ့ သူတော်ကောင်းတွေကို တစ်ကျပ်သားလောက် မေတ္တာပို့ရင် အလွန်ဆိုးတဲ့ လူဆိုးတွေကို တစ်ပိဿာလောက် ပို့ပေးရမယ်.. ဒါမှ မျှတမှာဖြစ်တယ်..

မြင့်မြတ်သော နေထိုင်ခြင်း
အပိုင်းအခြားမရှိတဲ့ မိခင်စိတ်နဲ့ ကျယ်ကျယ်ပြန့်ပြန့် မေတ္တာပို့ပါ..
အိပ်ယာဝင် အိပ်ယာထချိန်လေးလောက် ပို့တာမျိုးမလုပ်ပါနဲ့
မေတ္တာပို့တဲ့ အခါမှာ- ရပ်နေတဲ့ အခါ၊ ထိုင်နေတဲ့ အခါ၊ သွားနေတဲ့ အခါ၊ လှဲနေတဲ့ အခါ လေးမျိုးလုံးမှာ မေတ္တာပွားနေခြင်းကို ဗြဟ္မာဝိဟာရ မြင့်မြတ်သော နေထိုင်ခြင်းလို့ ခေါ်တယ်..
မွန်မွန်မြတ်မြတ် နေထိုင်ခြင်းဖြစ်တယ်

မေတ္တာပွားတယ်ဆိုတာ ဘီလူးသရဲတွေကို နှင်ထုတ်ဖို့ မဟုတ်
ဘီလူးသရဲတွေထက် အလွန်ဆိုးသော မိမိရဲ့ဒေါသကို နှင်ထုတ်ဖို့ဖြစ်တယ်
ဒေါသစိတ်နဲ့ သွားနေသမျှ ကာလပတ်လုံး ရန်သူနဲ့ ခရီးသွားနေတာပဲ ဖြစ်တယ်
ရင်ထဲမှာ ရှိနေတဲ့ ဒေါသသည် မိမိရဲ့ အကြီးမားဆုံးသော ရန်သူ

မေတ္တာတရားထွန်းကားစေဖို့
ဒေါသမျက်လုံးက အပေါ်ယံ မကောင်းတာလောက်ကိုပဲ မြင်တတ်တယ်
ဒေါသမပါသော မျက်လုံးက အပေါ်ယံအောက်က အကောင်းကို ရှာဖွေကြည့်မြင်တတ်တယ်
အကောင်းမြင်စိတ် နဲ့ မကောင်းမြင်စိတ် ဒီလိုကွာခြားတယ်
မိမိဒေါသကို ဖယ်ရှားပြီး ကိုယ့်ပတ်ဝန်းကျင်က လူတွေကို အကောင်းမြင်တတ်ဖို့လိုတယ်
မကောင်းတာကို ဖယ်ကြည့်တတ်ဖို့ အထူးလိုအပ်တယ်
အဲဒါဆိုရင်အားလုံး စိတ်ချမ်းသာရမယ်...
ဒေါသလျော့သွားတာနဲ့ အကောင်းတွေချည်းပဲ မြင်လာမယ်..

အားလုံးကို အကောင်းတွေပဲရွေး မြင်တတ်အောင် ကြိုးစားနိုင်ကြမယ်ဆိုရင် မေတ္တာတရား ထွန်းကားလာမယ်
ကိုယ်တိုင်လည်း မကောင်းမှုဆိုရင် နည်းနည်းမှ မလုပ်ကြနဲ့
သတ္တ၀ါအားလုံးတွေ ကိုယ်ချမ်းသာကြပါစေ စိတ်ချမ်းသာကြပါစေ ဘေးရန်ခပ်သိမ်းကင်းငြိမ်းကြပါစေ.. လို့ မေတ္တာပို့ရမယ်

ဘုံသုံးဆယ့်တစ်၊ ဖြစ်ဖြစ်များစွာ သတ္တ၀ါ၊ ချမ်းသာ ကိုယ်စိတ်ပြည့်ပါစေ၊ ဘယာဝေး၍ အေးပါစေ...

ဒီလိုပို့ရမယ်

တိုးတက်လာသော အရည်အသွေးများ
နေ့ရောညရော မပျင်းမရိ မေတ္တာပွားနေတဲ့သူဟာ
ဘ၀မှာ မကောင်းတာမှန်သမျှ မမြင်ရတော့ဘူး
မျက်စိအောက်မှာ အကောင်းတွေချည်းပဲ မြင်လာကြားလာ ရတော့တယ်

နှလုံးသား အတွင်းပိုင်း စိတ်မှာလည်း အရည်အချင်း (၁၄)ပါး တိုးတက်လာမယ်

၁) လူစွမ်းကောင်း ဖြစ်လာမယ်
၂) ဖြောင့်မတ်လာမယ်
၃) အလွန့်အလွန် ဖြောင့်မတ်လာမယ်
၎) ပြောရဆိုရတာ လွယ်လာတယ် - ဒေါသ သမားကို ပြောရခက်တယ်
၅) ဆက်သွယ်ရတာ လွယ်လာတယ် ကြည့်လိုက်တာနဲ့ မျက်နှာမှာ အပြုံး မြင်ရတယ် ခြိမ်းခြောက် ဟိန်းဟောက်နေတာမျိုး မရှိတော့
၆) နူးညံ့ သိမ်မွေ့လာတယ်
၇) မာန် မာန မရှိတော့
၈) ရောင့်ရဲ တင်းတိမ်သွားတယ် ပြုစုလုပ်ကျွေးရတာလည်း လွယ်လာတယ်
၉) သူ့အတွက် သူတပါးတို့ ဆောင်ရွက် တာဝန်ယူပေးရတဲ့ အရာ အရမ်းနည်းလာတယ်
ဒေါသ သမားကတော့ မရောင့်ရဲနိုင်လို့ သူ့အတွက် လုပ်ပေးရသူတွေ အရမ်းတာဝန်သင့်တယ်
၁၀) ကိုယ်ရော စိတ်ရော အမြဲပေါ့ပေါ့ပါးပါးရှိတယ်
ဒေါသ သမားက အမြဲစိတ်ထဲ လေးနေလိမ့်မယ်
၁၁) မျက်စိ နား နှာ ကိုယ်စိတ် အိန္ဒြရေ ရှိလာမယ်
၁၂) ရင့်ကျက်တဲ့ ပညာရှင်တစ်ယောက် ဖြစ်လာမယ် ဒေါသ သမားက ပညာတုံးလာမယ်
၁၃) ကိုယ်နှုတ်နှစ်ပါး တည်ငြိမ်လာမယ် ယဉ်ကျေးလာမယ်
၁၄) မေတ္တာသမားမှာ ချစ်သူကို ချစ်လို့ တွယ်တာခြင်း၊ မုန်းသူကို မုန်းလို့တွယ်တာခြင်း မေ့မရခြင်း မရှိတော့ဘူး

ဘုံသုံးဆယ့်တစ်၊ ဖြစ်ဖြစ်များစွာ သတ္တ၀ါ၊ ချမ်းသာ ကိုယ်စိတ်ပြည့်ပါစေ၊ ဘယာဝေး၍ အေးပါစေ...

အခု ဖော်ပြထားတာတွေက တချို့တ၀က်မျှသာ ဖြစ်ပါတယ် .. ဆရာတော် ဟောကြားထားတာက အများကြီးပြည့်စုံပါတယ်
ဖော်ပြထားတာတွေမှာ တစ်ခုခု အမှားအယွင်းများပါရှိခဲ့ရင် ကျွန်တော့်ဘက်က ချွတ်ယွင်းချက်သာ ဖြစ်ပါတယ်...
အမှတ်မလွဲရအောင် ဖတ်ပြီးသွားရင် တရားတော်ကို ရယူနာကြား စေချင်ပါတယ်

-"မေတ္တာတရား" တရားတော် - ရယူနာကြားနိုင်ရန်

သူငယ်ချင်း ညီအကို မောင်နှမ မိတ်ဆွေများအားလုံး ...
အမျိုးဘာသာ၊ သာသနာတော်အကျိုးကို တတ်အားသမျှ သယ်ပိုး ထမ်းရွက်သွားနိုင်ကြသူများ ဖြစ်ကြပါစေလို့ ...
ဆုတောင်း မေတ္တာ ပို့သလိုက်ပါတယ် ....